Biziola kooperatibak Goierri eskualdeko herritarrak, ekonomia sozial eraldatzaileko eragileak eta bestelako erakundeak saretzea du helburu, Goierri burujabeago, iraunkorrago eta orekatuago baten bidean proiektu zehatzak martxan jarriz.

Elikadura burujabetzaren bidean, eskualdeko ekoizleen produktuen salmentarako gunea, produktuak bildu eta banatzeko logistikarako gunea eta, agroekologiaren bidean, hezi eta hezteko espazio bat da.

Hurbilekoak eta sozialki justuak diren kontsumo-ereduak garatu eta indartzeko proiektua da Ereindajan. Irabazi asmorik gabeko egitasmoa da, Debagoiena duelarik bere lan- eta eragin-eremua. Nekazal eredu agroekologikoa bultzatzea dute helburu, bailarari arnasa emanaz. Debagoienako zein Euskal Herri osoko elikagai eta produktuen salmentan aritzen dira (%95a ekologikoa), ekoizleek bitartekarien beharrik gabe ekarriak.

Kolektiboki antolatutako zerbitzua da Herrerako Sukaldea; denbora, esfortzua eta gastuak elkarrekin aurreztuz, lurraldeko 1go sektore eta dendetako lehengaiekin egindako jaki osasuntsuak, goxo eta merke, etxera eramateko.